“हिरो बन्ने सपना देख्दै ११ हजार जनताले भरिएको सेटमा फिल्म खिचिएको थियो, तर वास्तविकताले अचानक करोडौंको भ्रष्टाचार र जेलको सजाय सुनाइदियो!”
यो कुनै फिल्मी कहानी होइन यो सर्लाहीका मेयर भरत थापाको वास्तविक जीवन हो। जसलाई प्रेरणादायी नायकको रूपमा चलचित्रको पर्दामा ल्याउने तयारी भइरहेको थियो, त्यही व्यक्ति आज अदालतबाट भ्रष्टाचारी घोषित भएका छन्। नेपाली चलचित्र जगतको इतिहासमै सबैभन्दा विचित्र यो घटनाले कला र वास्तविकताबीचको सीमारेखा धमिलो पारिदिएको छ।
२०८० फागुन २ गते सरस्वती पूजाको शुभ दिनमा काठमाडौंको नारायणहिटी मन्दिरमा स्क्रिप्ट र क्यामेरा पूजा गरेर ‘मेयर’ फिल्मको छायांकन सुरु भएको थियो। पटकथा प्रोडक्सनको निर्माणमा बन्न लागेको यो फिल्म सर्लाहीस्थित बागमती नगरपालिकाका मेयर भरत थापाको जीवन संघर्षमा आधारित छ।
फिल्म ‘मेयर’को टिजर पोस्टर
फिल्मका निर्माताहरूले यो चलचित्रलाई एक प्रेरणादायी कथाको रूपमा प्रस्तुत गर्ने योजना बनाएका थिए। कठिन परिस्थिति र घात-प्रतिघातको बीचमा पनि कसरी एक व्यक्तिले संघर्ष गरेर समाजलाई आर्थिक, सामाजिक र शैक्षिकरूपमा राम्रो बाटोमा डोर्याउन सक्छ भन्ने विषयलाई केन्द्रमा राखेर यो फिल्म निर्माण गरिएको थियो।
फिल्मको मुख्य भूमिकामा खगेन्द्र लामिछाने छन् , जसले मेयर भरत थापाको भूमिका निर्वाह गरेका थिए, उनको विपरीत भूमिकामा वर्षा राउतलाई राखिएको थियो। सहायक भूमिकामा अर्पण थापा, अनुप बराल, दिव्यदेव, प्रकाश घिमिरे, हरिहर शर्मा, रविन्द्र झा, रमेश बुढाथोकीलगायतका कलाकारहरूको अभिनय छ।
निर्देशक दीपेन्द्र के खनालले यो फिल्मको घोषणा गर्दा धेरैले काठमाडौंका मेयर बालेन शाहलाई सम्झिएका थिए। तर वास्तवमा यो चलचित्र सर्लाहीका मेयरको कथामा आधारित थियो।
यो फिल्मको सबैभन्दा उल्लेखनीय पक्ष यसको छायांकनमा भएको ठूलो जनसहभागिता थियो। करिब एक महिना सर्लाहीको बागमती नगरपालिकामा नै फिल्मको छायांकन भएको थियो। फिल्मको अधिकांश दृश्यमा ३-४ हजार जनता सहभागी थिए।फिल्मको क्लाइमेक्स सीनको छायांकन सबैभन्दा चर्चित भएको थियो । दुई दिन लगाएर गरिएको यो क्लाइमेक्स सीनमा ११ हजार जनतालाई क्यामेराको फ्रेममा राखेर निर्देशक दीपेन्द्र के खनालले फिल्म खिचेका थिए। यो संख्या नेपाली चलचित्र इतिहासमा एकै पटकमा सबैभन्दा बढी जनसंख्यालाई एक फ्रेममा राखेर खिचिएको दृश्य मानिन्छ।
तस्बिर: दीपेन्द्र के खनाल
मेयर भरत थापाकी छोरी अर्विशा थापाले यही फिल्मबाट नेपाली चलचित्र क्षेत्रमा डेब्यू गरेकी थिइन्। यसले फिल्मलाई थप व्यक्तिगत र भावनात्मक आयाम दिएको थियो तर फिल्मको छायांकन जारी रहँदै गर्दा नै मेयर भरत थापाविरुद्ध भ्रष्टाचारको मुद्दा दायर भएको थियो। अख्तियार दुरुपयोग अनुसन्धान आयोगले उनीविरुद्ध अकुत सम्पत्ति आर्जन गरेको भन्दै ५ करोड ३३ लाख ५३ हजार १८१ रुपैयाँ बिगो दाबीसहित मुद्दा हालेको थियो।
हालै विशेष अदालतका न्यायाधीशहरू टेकनारायण कुँवर, मुरारीबाबु श्रेष्ठ र विदुर कोइरालाको इजलासले थापासहित ६ जना विरुद्धको मुद्दामा फैसला सुनाएको छ। अदालतले थापासहित विमलकुमार पोखरेल र सागर पौडेललाई दोषी ठहर गरेको छ।
अदालतका अनुसार बागमती नगरपालिकामा मूल्य अभिवृद्धि करसहित ३० करोड २९ लाख ३४ हजार ८९७ रुपैयाँ ४० पैसा बराबरको नदीजन्य पदार्थको हानिनोक्सानी गरेको पुष्टि गरिएको छ। अदालतले उनीहरूलाई भ्रष्टाचार निवारण ऐन, २०५९ को दफा १७ अन्तर्गतको कसूरमा दोषी ठहर गर्दै सजाय निर्धारणका लागि साउन २९ गते पेशी तोकेको छ।
भ्रष्टाचारको आरोपमा मात्र नभएर मेयर थापालाई गैरकानूनी सम्पत्ति आर्जन गरेको मुद्दामा पनि दोषी ठहर गरिएको छ। अदालतको फैसलाअनुसार थापाको कुल आय ९ करोड १४ लाख ३१ हजार रुपैयाँ ९१ पैसा रहेकोमा कुल व्यय १२ करोड ५९ लाख ५३ हजार रुपैयाँ १४ पैसा रहेको देखिएको छ।
यसअनुसार थापाले ३ करोड ४५ लाख २२ हजार ३८७ रुपैयाँ २३ पैसा बराबरको सम्पत्ति गैरकानूनी रूपमा आर्जन गरेको प्रमाणित भएकोले उनलाई एक वर्ष कैद र त्यति नै बराबरको जरिवाना हुने ठहर अदालतले गरेको छ। सो सम्पत्ति र त्यसबाट बढाइएको सम्पत्ति जफत हुने पनि अदालतले आदेश दिएको छ।
यी सबै घटनाक्रमले फिल्म ‘मेयर’को भविष्य अनिश्चित बनाएको छ। श्रृष्टिमाँ खनाल र शर्मिला पाण्डेको लगानीमा बनिरहेको यो फिल्ममा दीपेन्द्र के खनाल कार्यकारी निर्माताको रूपमा छन्।
जुन व्यक्तिको जीवन संघर्षलाई प्रेरणादायी कथाको रूपमा प्रस्तुत गर्ने उद्देश्यले यो फिल्म निर्माण गरिएको थियो, त्यही व्यक्ति अहिले भ्रष्टाचारमा मुछिएपछि फिल्मको भविष्य के हुन्छ भन्ने प्रश्न उठेको छ।
यो घटनाले नेपाली चलचित्र क्षेत्रमा एउटा महत्वपूर्ण नैतिक प्रश्न खडा गरेको छ। के भ्रष्टाचारमा मुछिएका व्यक्तिको जीवनमा आधारित फिल्म प्रदर्शन गर्नु उचित हो वा कला र कलाकारलाई वास्तविक जीवनका घटनाहरूबाट अलग राखेर हेर्नुपर्छ?यी प्रश्नहरूको जवाफ सजिलो छैन। एकातिर फिल्ममा धेरै कलाकारहरूको मेहनत र लगानी छ, अर्कोतिर यस्तो विवादास्पद व्यक्तिको महिमामण्डन गर्ने कुरा नैतिक रूपमा सही मानिन्न।
फिल्म ‘मेयर’को कथा नेपाली चलचित्र क्षेत्रका लागि एउटा सिकाइनै बनेको छ।
यो फिल्मको भाग्य के होला भन्ने कुरा अझै अनिश्चित छ। तर यसले छाडेको प्रभाव र उठाएका प्रश्नहरूले नेपाली चलचित्र जगतमा लामो समयसम्म छलफलको विषय बन्ने निश्चित छ।
फिल्म उद्योगमा संलग्न व्यक्तिहरूले यस घटनाबाट सिकेर भविष्यमा यस्ता समस्याहरूबाट बच्न सक्ने आशा गर्न सकिन्छ। अन्ततः, कला र वास्तविकताबीचको सन्तुलन कायम राख्नु नै सबैभन्दा ठूलो चुनौती हो।
साकार कोईराला
साकार कोइराला वर्ल्डइन्फो न्यूज गोल्बलका प्रबन्धक हुन् र सामाजिक, राजनीतिक तथा कानुनी विषयहरूमा कलम पनि चलाउछन ।
प्रतिक्रिया
सम्बन्धित खवर
