थाइल्यान्ड र कम्बोडियाबीचको सीमा क्षेत्रमा पछिल्ला दुई दिनदेखि जारी घातक झडपले गम्भीर रूप लिन थालेको छ। थाईल्यान्डका कार्यवाहक प्रधानमन्त्री फुमथाम वेचाचाइले शुक्रबार चेतावनी दिँदै यो झडप युद्धमा परिणत हुन सक्ने बताएका छन्। उनका अनुसार हिंसात्मक झडपका कारण अहिलेसम्म १ लाख ३० हजारभन्दा बढी नागरिकहरू विस्थापित भइसकेका छन्।
दशकौंदेखि जारी सीमा विवाद बिहीबारबाट एक्कासि जेट, तोपखाना, ट्याङ्क तथा स्थल सेनाहरू प्रयोग गरिएका युद्धस्तरीय झडपमा परिणत भएको हो। संयुक्त राष्ट्रसंघीय सुरक्षा परिषद्ले पनि यस विषयमा शुक्रबार आपतकालीन बैठक डाक्ने तयारी गरिरहेको छ।
कम्बोडियाली साइडमा ओड्डर मिन्चे प्रान्तले ७० वर्षीय एक नागरिकको मृत्यु र पाँच जनाको घाइते भएको पुष्टि गरेको छ। उता थाइल्यान्डको स्वास्थ्य मन्त्रालयका अनुसार १४ जना नागरिक र एक जना सैनिकको मृत्यु भएको छ भने ४६ जना घाइते छन्। थाई सेनाले शुक्रबार बिहान ४ बजेबाट झडप फेरि सुरु भएको जनाएको छ।
थाई सेनाका अनुसार कम्बोडियाली सेनाले भारी हतियार, आर्टिलरी र बीएम–२१ रकेट प्रणालीमार्फत बमबारी गरिरहेको छ। जवाफमा थाई सेनाले पनि ‘उचित सहायक फायर’ प्रयोग गरेको बताएको छ। थाइल्यान्डले एफ–१६ जेट प्रयोग गरी सीमापारका सैन्य लक्ष्यहरूमा आक्रमण गरेको छ।
सीमाबाट २० किलोमिटर टाढा रहेको कम्बोडियाली सहर सामराङमा नागरिकहरू आत्तिएर गाडीमा सामानसहित भाग्दै गरेको दृश्य देखिएको छ। बौद्ध मन्दिरहरूमा शरण लिने क्रम जारी छ। “हामी कहिले घर फर्कन सक्छौं थाहा छैन,” एक स्थानीय नागरिक प्रो बाकले भने।
थाइल्यान्ड र कम्बोडियाबीच कूटनीतिक सम्बन्ध चिसिँदै गएको छ। थाइल्यान्डले कम्बोडियाली राजदूतलाई निष्कासन गरेको छ भने कम्बोडियाले आफ्ना अधिकांश कूटनीतिज्ञहरूलाई फिर्ता बोलाएको छ। नोम पेन्हस्थित थाई कूटनीतिज्ञहरूलाई समेत निष्कासन गरिएको छ।
मलेसियाका प्रधानमन्त्री अनवर इब्राहिमले दुवै देशका नेतासँग बिहीबार वार्ता गरी युद्धविराम र संवादको आह्वान गरेका छन्। युरोपेली सङ्घ (EU), चीन, फ्रान्स र संयुक्त राज्य अमेरिका लगायतले पनि शान्तिका लागि जोड दिएका छन्।
थाइल्यान्ड–कम्बोडिया सीमामा झडपको इतिहास लामो छ। २००८ देखि २०११ बीचको झडपमा कम्तीमा २८ जनाको मृत्यु भएको थियो। सन् २०१३ मा अन्तर्राष्ट्रिय अदालतले विवाद समाधान गरेको भए पनि मे महिनामा एक कम्बोडियाली सैनिकको मृत्यु भएपछि पछिल्लो तनाव सुरु भएको हो।
World Info Nepali is a comprehensive news portal delivering the latest updates in both Nepali and English. We are a part of Worldinfo.news Global, committed to providing accurate, timely, and balanced news from Nepal and around the world.
प्रतिक्रिया
सम्बन्धित खवर
