विश्व प्रसिद्ध रेसलर तथा डब्ल्यूडब्ल्यूईका हल अफ फेमर हल्क होगनको ७१ वर्षको उमेरमा निधन भएको छ। उनको निधनको कारण कार्डियक अरेस्ट (हृदयाघात) भएको अमेरिकी मिडियाहरूले पुष्टि गरेका छन्।
हल्क होगनको वास्तविक नाम टेरी जीन बोलिया हो। १९८० र १९९० को दशकमा उनले डब्ल्यूडब्ल्यूई (त्यतिबेला डब्ल्यूडब्ल्यूएफ) लाई विश्वव्यापी लोकप्रियता दिलाउन महत्वपूर्ण योगदान दिएका थिए। उनले चलाएको ‘हल्कमेनिया’ अभियान र दमदार स्टाइलले रेसलिङको छविलाई नयाँ उचाइमा पुर्याएको थियो। सन् १९८४ मा आयरन शेखलाई पराजित गरी डब्ल्यूडब्ल्यूएफ च्याम्पियनशिप जितेपछि ‘हल्कमेनिया’को औपचारिक शुरुआत भएको थियो।
उनको प्रसिद्ध सिग्नेचर मुभ, विशेषतः “लेग ड्रप,” र माइकमा बोलेका प्रेरणादायी संवादहरूले उनीलाई विश्वभरका प्रशंसकहरूका लागि एक प्रेरणादायी रेसलिङ आइकन बनाएको थियो।
स्थानीय मिडिया र टीएमजेडका अनुसार, होगनको निधन जुलाई २४, २०२५ को बिहीबार बिहान फ्लोरिडाको क्लियरवाटरस्थित उनको घरमा भएको हो। आपतकालीन सेवाहरू घटनास्थलमा बोलाइएका थिए। प्रहरी र चिकित्सक टोलीले उनलाई तुरुन्त स्ट्रेचरमा राखेर अस्पताल पुर्याए पनि, चिकित्सकहरूको अथक प्रयासका बावजुद बचाउन सकिएन।
हालैका महिनाहरूमा होगनको स्वास्थ्यबारे विभिन्न अफवाहहरू फैलिरहेका थिए। तर, उनकी पत्नी स्काई डेलीले केही हप्ता अघि उनको स्वास्थ्य राम्रो रहेको र उनी सर्जरीबाट रिकभर भइरहेका बताएका थिइन्। दुर्भाग्यवश, अचानक आएको हृदयाघातले हल्क होगनको जीवनको अन्त्य गर्यो।
डब्ल्यूडब्ल्यूईले एक आधिकारिक वक्तव्य जारी गर्दै होगनको निधनप्रति गहिरो शोक व्यक्त गरेको छ। वक्तव्यमा भनिएको छ, “हल्क होगनले रेसलिङ इतिहासमा जुन प्रभाव पारे, त्यो अविस्मरणीय छ। उनी सधैं एक महान् सुपरस्टारका रूपमा सम्झिनेछन्।”
हल्क होगनको निधनले रेसलिङ दुनियाँमा ठूलो खालीपन पैदा गरेको छ। विश्वभरका प्रशंसकहरू र खेलकुद क्षेत्रका व्यक्तित्वहरूले सामाजिक सञ्जालमार्फत श्रद्धाञ्जली अर्पण गरिरहेका छन्।
World Info Nepali is a comprehensive news portal delivering the latest updates in both Nepali and English. We are a part of Worldinfo.news Global, committed to providing accurate, timely, and balanced news from Nepal and around the world.
प्रतिक्रिया
सम्बन्धित खवर
