३२ लाख रुपैयाँ घुस प्रकरणमा विवादमा तानिएका भूमि व्यवस्था, सहकारी तथा गरिबी निवारण मन्त्री बलराम अधिकारीले आफूमाथि लागेको आरोप अस्वीकार गरेका छन्। अडियो आफ्नो नभएको स्पष्ट पार्दै उनले यो नियोजित षड्यन्त्रका रूपमा आफूलाई बदनाम गर्ने प्रयास भएको दाबी गरे।
बिहीबार मन्त्रालयको एक वर्षे प्रगति सार्वजनिक गर्न आयोजित पत्रकार सम्मेलनमा बोल्दै मन्त्री अधिकारीले भने, “अडियोमा सुनिएको बोली, नाम र प्रसंग मेरा होइनन्। यो न त मैले बोलेको हुँ, न त यससँग मन्त्रालयको कुनै सम्बन्ध छ।” उनका अनुसार अडियो सुन्दा नै आफूले केही बोलेको नभएको प्रस्ट हुन्छ।
अधिकारीले यो अडियो प्रकरण मालपोत अधिकृतको सरुवा प्रक्रियासँग जोडिएको भन्दै कसैले व्यक्तिगत रिसइवीका आधारमा बदला लिन अडियोको सहारा लिएको आरोप लगाए। उनले भने, “सरुवा रोकिनु केहीलाई मन परेन, त्यसैले यस्तो अपचलन गरिएको हो। यो चरित्र हत्या गर्ने नियोजित प्रयास हो।”
तर, पत्रकार सम्मेलनमा मन्त्री अधिकारीले अडियोमा उल्लेख भएका अन्य व्यक्तिहरूका नाम, प्रसंग र अडियोको सत्यतामाथि भने कुनै प्रष्टता दिएका छैनन्। उनले केवल आफूमाथि लागेको आरोप अस्वीकार गरे र संवाद टुंग्याए।
World Info Nepali is a comprehensive news portal delivering the latest updates in both Nepali and English. We are a part of Worldinfo.news Global, committed to providing accurate, timely, and balanced news from Nepal and around the world.
प्रतिक्रिया
सम्बन्धित खवर
