इरानको राजधानी तेहरानमा गत जुन १५ मा भएको इजरायली हवाई आक्रमणका क्रममा राष्ट्रपति मसूद पेजेशकियान सामान्य घाइते भएका छन्। अल जजिराको रिपोर्ट अनुसार तेहरानको पश्चिमी क्षेत्रमा रहेको इरानको सर्वोच्च राष्ट्रिय सुरक्षा परिषद्को उच्चस्तरीय बैठकलाई लक्षित गर्दै गरिएको सो आक्रमणमा राष्ट्रपति पेजेशकियानको खुट्टामा सामान्य चोट लागेको हो।
आक्रमणका बेला राष्ट्रपति आपतकालीन निकासमार्ग प्रयोग गरी भवनबाट बाहिरिन बाध्य भएका थिए। आक्रमणपछिको पहिलो प्रतिक्रियामा पेजेशकियानले इजरायललाई चेतावनी दिँदै भनेका छन्, “इजरायलले यो आक्रमणको लागि मूल्य चुकाउनुपर्नेछ।”
उक्त बैठकमा राष्ट्रपति पेजेशकियानसहित सरकारका कार्यकारी, विधायिका र न्यायिक शाखाका प्रमुखहरू तथा अन्य वरिष्ठ अधिकारीहरू उपस्थित थिए। इजरायली आक्रमणमा भवनको प्रवेशद्वार र निकासमा छवटा क्षेप्यास्त्र प्रहार गरिएको थियो, जसले भाग्ने मार्ग अवरुद्ध गर्नुका साथै हावाको बहाव रोकिएको थियो।
विस्फोटपछि भवनको विद्युत आपूर्ति अवरुद्ध भएको थियो तर अधिकारीहरू पूर्व निर्धारित आपतकालीन मार्ग प्रयोग गरी सुरक्षित रूपमा बाहिरिन सफल भएका थिए। इजरायली स्रोतका अनुसार राष्ट्रपति भवनको ढोकाबाट निस्कँदै गर्दा उहाँको खुट्टामा सामान्य चोट लागेको हो।
अल जजिराका अनुसार इरानी अधिकारीहरूले घटनाको पछाडि इजरायली जासुसी गतिविधि हुन सक्ने आशंकामा अनुसन्धान सुरु गरेका छन्। “शत्रु” सँग गुप्त सूचना लीक भएको सम्भावनालाई मध्यनजर गर्दै सुरक्षा निकायहरूले इजरायली गुप्तचरहरूको उपस्थिति वा गतिविधिबारे गहिरो अनुसन्धान थालेका छन्।
यही सन्दर्भमा अमेरिकी पत्रकार टकर कार्लसनलाई दिएको अन्तर्वार्तामा राष्ट्रपति पेजेशकियानले इजरायलले आफूलाई हत्या गर्न प्रयास गरेको खुलासा गरेका थिए। “तिनीहरूले प्रयास गरे तर असफल भए,” उनले भने, “यो आक्रमणमा अमेरिकाको संलग्नता थिएन, यो इजरायलको काम थियो।”
जुन १३ मा इजरायलले इरानविरुद्ध एक्कासि हवाई आक्रमण सुरु गरेपछि उच्चस्तरीय सैनिक कमाण्डर र आणविक वैज्ञानिकको मृत्यु भएको थियो। त्यसको लगभग दुई हप्ता पछि राष्ट्रपति घाइते भएको खबर सार्वजनिक भएको हो।
इरानको फाउन्डेसन अफ मार्टyrs एन्ड भेट्रान्स अफेयर्सका अनुसार पछिल्ला द्वन्द्वहरूमा कम्तीमा १,०६० जना इरानी नागरिकको मृत्यु भइसकेको छ। इजरायलमा समेत इरानको प्रतिशोधात्मक कारबाहीका कारण २८ जनाको ज्यान गएको पुष्टि भएको छ।
युद्ध तनावबीच अमेरिकाले दुबै पक्षबीच युद्धविरामको पहल गरे पनि इरानले इजरायली सैन्य तथा गुप्तचर मुख्यालयहरूलाई ब्यालेस्टिक मिसाइल र ड्रोनद्वारा निशाना बनाएको थियो। क्षेत्रीय स्थायित्व र सुरक्षा गम्भीर चुनौतीमा परेको देखिन्छ।
World Info Nepali is a comprehensive news portal delivering the latest updates in both Nepali and English. We are a part of Worldinfo.news Global, committed to providing accurate, timely, and balanced news from Nepal and around the world.
प्रतिक्रिया
सम्बन्धित खवर
